آذار إنت بذاتنا منب
يا وهج شمعة يا لظى مدمع
آذار يا آذار يا مقلع
يا فجر ضوّى يا جمر ولّع
آذار يا آذار يا موقع
بالعزّ ضوّى بالمجد شعشع
تربّع على عين الدني ووزّع
صوتو على التاريخ وتوسّع
آذار يا آذار عم نسمع
أخبار عم بتقلّق المضجع
عن ناس بدا بهالوطن تخضع
خسيوا ما بعدو السيف عم يلمع
وصدرنا بوجه الدني مشرّع
لبنان يا لبنان ما منركع
مهما بقصفن زلزلوا الموضع
مهما قلْب إمّاتنا تشلّع
مهما دمْع خيّاتنا دمّع
منصرخ بوجه ال بعد عم يطمع
وبكلّ ساحة صوتنا منرفع
يا خايفين الموت والمصرع
درب الشهادة شعبنا بيتبع
يلي رضع من قمحة الرشّاش
بيرقص على تنغيمة المدفع
لبنان يا لبنان غيرك ما حلي
ع قلوبنا وباقي كبير المنزلي
عشرين عام مغامرة ومخاطرة
ومحاولي تكرج وراها محاولي
لبنان وِحدي والشعوب الشاطرة
ما بتتركش جمراتها بالمنقلي
انْ هبّ الهوا المجنون بليالي الكرى
الجمرا اللي بتدفّي بتصبح قاتلي
شو ناطرة يا بلادنا شو ناطرة
بوهم المحطّة رح تضيع الحافلي
الحلّ عنّا والعقيدة حاضرة
وبذاتها حلّ المشاكل حاملي
لبعضنا نحنا ورح نبقى سوا
والقافلي بتمشي شو هم القافلي
ان نبّح عليها كلب واطي المستوى
عبري أميركاني ضباعو سافلي
بيهمّنا لبنان مرفوع اللوا
موحّد عظيم الشان عالي معتلي
صهوة التاريخ ثقيل المحتوى
جبالو بأرزات الشموخ مكلّلي
مش كلّ ما شارون ع حدودو عوا
بدو بأرض لبنان توقع مهزلي
يا ناس يلي من الحليب بينكوا
ان شاف اللبن بينفِّخو متل الحليب
وبيضلّ بالأوهام كاسو منتلي
سعاده إبن لبنان لحّمنا سوا
شوفو العقيدي كيف فينا فاعلي
كنا متل هالناس نمشي عالهوا
وأطماحنا كانت عقدّ العائلي
شفينا ومرضنا طاب من أول دوا
وقبالكن صرنا حقيقة ماثلي
وصار مقصدنا كبير المستوى
وصار في عنا قضية شاملي
مش فارقة عنا ال ع مجلسنا اعتلى
إن كان إسمو الياس أو إسمو علي
كلنا من فرد جمرة مننكوى
وكلنا من أرض وحدي مأصّلي
فوتو لعنّا كبار تا نناضل سوا
جرّبو نور القضيّي العادلي
تا نركّع التاريخ ونشدّ القوى
ويرجع إله جبيل يهدي هالبشر
مش كلّ عشر سنين نعمل جلجلي
لبنان يا لبنان فينا شو جرى
ع حساب بالطائف نهيتو المسألي
رجعتنا فرائضه القويي مكسرا
وبذاتنا السوسي الرهيبي مغلغلي
الأزلام رجعت والنفوس موتّرا
الأقزام ع صرح الشرف متسلّلي
الأوهام كبرت والعقول محجّرا
الأنغام ع قيد النشاز موكّلي
رجعتلنا الستي وستي مكرّرا
وما بين حرب وحرب مية فاصلي
عالأرض فقر وألف عيلي معتّرا
وفوق الأرض قهوة وجريدي وتنبلي
الفيران كترت في زوايا الموكرا
وإيد الفساد مقطّعة وموصّلي
ال بالزعبرا تعيّن شعارو الزعبرا
ال بالبرطلي ترقى شعارو البرطلي
الخلّ دودو عن ضميرو مسطرا
ال ما بيستحي ما بتنفعوش البهدلي
حتى وراق البول عنا مزوّرة
ومن دون عملي ما بتمشي معاملي
كلّ يوم واحد باع والتاني اشترى
وكلّ شهر في عنّا فضيحة ومهزلي
الأخلاق لعبة والحقيقة محوّرة
والكذب خطّة والديون مأجّلي
الطرقات فوضى والسواقة مغامرة
شي الزفت مش موجود شي سعرو غلي
الهاتف معطّل والدروب محفّرا
والخليوي بيّاع لعبي مبكّلي
يا ناس ضقنا من دروب السمسرا
هيدا وطن مش كنبيالي مأجّلي
اليهود نيابن عن النيوب مكشّرا
ونحنا اختلفنا ع البحص والمرملي
شو هالبلد يلي أمورو محيّرا
منحوت ناطر وضراس مكلكلي
المحتال شاطر والأوادم معيرا
والديك عم بيصيح فوق المزبلي
الجو ملوّث والمياه مكرّرا
ع فتحة المجرور يا ليلى انخلي
نحنا شعب ع العتم عم ياكل هوا
منيح اللي بعدا الكهربا مش واصلي
يا نتنياهو بيكفّي بهورا
نحنا شلحنا من زمان المريلي
شارون بإمكانو يقلك شو جرا
عند ما فكّر بنزهة فاشلي
لولا بتنطق بالكلام صنوبرة
بتروي إلك هاك الحكايا المخجلي
كان الضهر والشمس متل المجمرا
وتفرّعوا فوق الحشيش المخملي
زائر رصدهم والشباب محضّرا
وزائر تعلّم كيف يتحدّى البِلي
عنا صور يا نتنياهو مصوّرا
وعنا النجمي والرقم والسلسلي
بعدا علامات المشي والجرجرا
وبعدو بوادي المتن صوت الولولي
يبكو ويحكو إنكليزي مكسّرا
ريحا كريها والتياب مبلّلي
يا نتنياهو بيكفي عنترة
ما تحلمش تعمل علينا بو علي
شرف لعنا ان كان عندك مقدرا
لبنان قلعة والدماء محلّلي
عا كل لفة كوع عنا مقبرة
وع سطوحنا عنا حجار ومحدلي
وبعدو إذا بدو أمير المرجلي
بيصور بعدا والنفوس محرّرا
وجزين بعدا والعروس مكللي
منهدي إلك أجسادنا المتفجرا
قنبلي تطلع وراها قنبلي
نفس الدوا عنّا الروشتا حاضرا
أطفالنا بالمهد عم تغلي غلي
طلوب الأطبا وشوف ختم المخترا
وبتجاوبك لولا سألت القابلي
يا نتنياهو كل ما تحبل مرا
ببلادنا بتولد سناء محيدلي
صباح الخير والردّاد ردّد
يا فلسطين يا أرض العمادي
نحنا عندنا هونيك موعد
بيرجف عكفة السيف الهنادي
وبكرا بيشهد التاريخ مشهد
لما بأرضنا ينادي المنادي
شباب ممنطقة بمنطاق أسود
على أجسادها رصاصي ورمادي
زوابع عينها جمرات موقد
حملها جيش مصقول الإرادي
تسحب غابة الرمح المسدّد
تسقي بشفارها بدم الأعادي
حدود بلادنا والأرض مقصد
جلّ وجل وادي بعد وادي
من لبنان للرمل المحدّد
من طوروس للجزء المحيّد
من زغروس للقطر المهدّد
من كيليكيا لصحراء سينا
لا ناقص شبر ولا سانتي زيادي.
